سين سؤال

حبيبتي سوسة المفروسة أم دم خفيف إفتكرتني بالتاج اللي الكل تقريبا عمله

و انا قلت أجرب انا كمان .. مش حخسر حاجه

هل أنت راض عن مدونتك شكلا وموضوعا؟؟

و الله لسه مش قوي أنا لسه جديده و طمعانه أكون أحسن و اتعرف أكتر

هل تعلم أسرتك بشأن مدونتك؟؟

لا خالص ما فيش غير جوزي بس يعرف اني عامله مدونه لكن مايعرفش اسمها

هل تجد حرجا في أن تخبر صديقك عن مدونتك؟؟

لم أخبر سوى صديقه واحده لأنها أكثر من صديقه و لأنها الوحيده التي أعلم أنها ستهتم بالقراءة لي و دفعي لأكون أحسن

هل تعتبر مدونتك أمر خاص بك؟؟

طبعا لأن جمالها أنك تكون حر من اسمك و عنوانك و كل حاجه انت بس انسان بيعبر عن رأيه و الناس بتقول رأيها في رأيه ناس ممكن تكون تعرفك و لا تعرفش انك انت اللي كاتب ده .. مش حب في الغموض لكن مساحة الخصوصيه اللي بتوفرها المدونه شيء ممتع

ـــ هل تسببت المدونات بتغيير إيجابى لأفكارك؟ اعطنى مثال فى حالة الإجابة بنعم

أيوه المدونات خلتني أكتشف إن في شباب كتيييييير جدا اكتر مما كنت أتصور ليهم فكر عالي جدا و ده خلاني أغير نظرتي لبكره بطريقه إيجابيه

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟

لا بقرأ لهم اكتر من بوست و لو عجبتني المدونه بقلب في الأرشيف و ساعات ادور على مدونات متعرفنيش لأن أنا أصبحت مدمنه قراءة مدونات يوميا

ـــ ماذا يعنى لك عداد الزوار.. هل تهتم بوضعه فى مدونتك؟

لا مش بعرف إزاي أحطه و معتقدش إني مهتمه إني أعرف أنا بهتم اكتر بالناس اللي بتعلق و نفسي يكتروا كمان و كمان

ــ هل حاولت تخيل شكل اصدقائك المدونين؟

لا مش بعرف في موضوع التخيل ده .. عمري مارسمت في خيالي صوره لحد معرفوش أنا بحس روح الإنسان بروحي و ده يكفيني

و في ناس نفسي كنت أقابلها في الحقيقه زي "دعاء " كروان و سوسه و كورتكس و مكسوفه و " أكتب بالرصاص" و كل حد بيكتب و بحبه من خلال كتابته

هل ترى فائدة حقيقية للتدوين؟

طبعا فكره جميله جدا ... انا مثلا كان حلمي اكون كاتبه و بكتب دايما في ورقي الخاص لكن الظروف كانت ضدي إني أحقق الحلم ده بالطريقه اللي انا عايزاها .. النهارده لو في خمسه بيقروا لي فده أحسن من إحساسي إنهي عندي موهبه غير مستغله و مرميه في درج .. و لو منجحتش في المدونه ممكن أعرف إني موهبتي متواضعه او معدومه و إن حياتي كده أحسن

هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟

طبعا متفاعل جدا .. و معبر عن زمنا و أحداثنا الحاليه بكل الطرق

ـــ هل يزعجك وجود نقد بمدونتك ؟ أم تشعر انه ظاهرة صحية؟

النقد ده شيء مفيد جدا لأن أنا مقتنعه" إن الآخر يرى دائما أفضل منك حتى لو كان مايراه خاطئا بالنسبة لك فإن زاويته أتاحت له الرؤيه بشكل خاطيء لم تضعه أنت في حسابتك و لم تتصور انت أن تٌرى "من تلك الزاويه

ــ هل تخاف من بعض المدونات السياسية وتتحاشاها؟

لا طبعا انا أقرأ و ده حقي مش لازم اكون موافقه او رافضه بس لازم اكون على علم

هل صدمك اعتقال بعض المدونين؟

لا ده شيء طبيعي فده دور الحكومه قدام المعارضه لازم يكون في شوية إرهاب علشان الأمور متتفتحش و الشيء اللي بتخاف منه أي حكومه يحصل .. الا و هو أن تتحول تلك المدونات من الرصد و الشجب و الإعتراض إلى التنظيم و التحريض ووضع خطوط فعليه كطريق مرسوم إلى الحل ... يعني لما انا اكتب ان الحياه زفت فكل الناس عارفه انها زفت و كاتمه في قلوبها لأن الكلام مش بيفيد لكن لما اقول الحياه زفت و لازم ناخد موقف تعالوا كلنا بكره نعتصم و مانروحش الشغل علشان غلاء الأسعار. أكون بده محرضه و ماشيه في السكه اللي ممكن أعلم بيها الناس إزاي تضغط على الحكومه.. لغاية دلوقتي كل اللي شفته تنفيس و شتيمه و إقرار للواقع

و بصراحه انا مبحبش قوي إسلوب الشتيمه ده لأنه مش حضاري خالص و لا بيفيد.. النقد الراقي أحسن بالنسبه لي

و انا احترم جدا مدونة بهيه

ـــ هل فكرت فى مصير مدونتك حال وفاتك؟

يعني خلاص مش حتكون موجوده .. و بعدين انا مش مهمه قوي يعني .. مدونه و توقفت ايه يعني

و ساعتها بقى ربنا يرحمني

- ما الاغنية التى تحب وضع اللينك الخاص بها فى مدونتك؟

مش بحب موضوع الأغنيه دي .. ليه لازم أفرض إحساسي كتابة و سمعا .. ما كفايه الكتابه و القاريء يسمع اللي هوه حاسه وخلاص أو ميسمعش هو حر ... موضوع الأغاني ده ساعات بيعصبني أكون عاوزه افتح كذا لينك و 100 اغنيه شغاله و متداخله و عاوزه تتقفل

اكتب اسماء خمسة مدونين ليقوموا بهذا الاسقصاء بعدك

متهيء لي معظم الناس عملته و انا مش عارفه بالظبط مين معملوش لأني جديده برضه و مش عارفه ناس كتير

علشان كده دي دعوه مفتوحه لكل اللي معملوش و له شوق يعمله

و ألف شكر يا سوسه