farida and trying to be special

Thursday, August 24, 2006

البعض يفضلونها صغيره

متضايقه جدا اني مقدرتش اكتب اليومين اللي فاتوا
و في حاجات كتير نفسي اكتبها بس مفيش وقت
خلي البوست ده خفيف كده و نتكلم في موضوع صغنون
هناك شخصان اعرفهما.. مطلقان و لهما أولاد .. لكن لكل منهما ظروف مختلفه.. تزوج كل منهما من سيده تصغره بما يقرب الثلاثين عاما.. وكلتاهما مطلقه و معها أطفال "واحد أو إثنين".. المهم
إن الفتاه عندما تتعدى سن الزواج و تتخطى الثلاثين أو حتى لو كانت مطلقه في الثلاثين أوقعها حظها العاثر في زواج قصير فاشل
تلك المرأه في مجتمعنا يحكم عليها بفئه معينه من الرجال .. اولا فارق السن يكون كبير جدا و ثانيا يجب أن يكون مطلق أو متزوج أو أرمل
بالنسبه للبنت التي لم تتزوج و تخطت الثلاثين قد تعثر على رجل أربيعني غير متزوج و غالبا ما تكون أسباب تأخره في الزواج مقلقه
و هم أصلا حالات قليله "أعني الرجال غير المتزوجين في هذه السن" أما من في الثلاثينات مثلها أو بكبرها بعم أو إثنين يفضل إمرأه صغيره عنه بعشر سنوات
و هذه هي قوانين مجتمعنا الواضحه فمن شبه المستحيل مثلا أن تتزوج مطلقه عندها ثمانيه و عشرون عاما مثلا شاب لم يسبق له الزواج
و العجيب أن توافق سيده في الثلاثين برجل تخطى الخمسين لأنها مطلقه.. و لأن كل من يتقدم لطلب يدها في الشريحه العمريه ما بين الأربعينات و الخمسينات و من الممكن الستينات
و أنا أخبر صديقة لي عن صاحبنا الذي تزوج مؤخرا من سيده بعمر ابنته
قالت لي
أنا أكره مصر و اكره الشرقيين يا عيني على الست تضطر تتجوز واحد مكرش قد ابوها علشان مفيش ليها غير كده رجاله دي لو عايشه بره و انفصلت كانت لقت راجل سنه قريب ليها و جايز مسبقلوش جواز
"
قلت لها " أيوه بس بره هما بيتجوزوا براحتهم يعني فيش سن معين للجواز و الراجل ده بيكون مر قبلها بكذا تجربه
و ثانية عدنا للخارج المنحل لكن المنصف أكثر و الداخل الملتزم و الظالم بفداحه
و هناك كثير من الامهات الرافضات لزواج أبناؤهن من مطلقات صغيرات و جميلات و محترمات .. تتحجج تلك الأم بحديث الرسول " هلا بكر تلاعبها و تلاعبك" نعم الرجل الشرقي يفضلها صغيره و بكر لم يمر عليها رجل حتى لو كان قد مر على ذكره الكثير من النساء قبلها .. و ليس الرجل وحده .. امه أو أخته لا تتقبل تلك الأخرى لأنها مطلقه لأن هذا هو موروثنا و معتقداتنا .. كلنا نعيش لقوانين أبعد ما تكون عن
المرونه و العداله
المهم .. انتم ما رأيكم؟؟؟

Labels:

22 Comments:

  • At 4:26 PM, August 24, 2006 , Blogger الغـــــــــــــريب said...

    البعض يفضلونها صغيره
    أحب أقولك رأيى كرجل ان معظمنا يفضلونها صغيره مش البعض وده ليه أسباب
    نتكلم بصراحه أحسن
    أولآ البنت المصريه فى سن تمنتاشر وعشرين بتكون مازالت رشيقه ومهتمه بنفسها وطبعآ مش بيجى فى بالهم أن البنت الصغيره دى بعد الزواج والحمل جسمها هايتغير يعنى المحصله واحده
    ثانيآ فى أعتقاد خاطىء عند الشباب أن العمر ده بتكون الأنثى أكثر حيويه ورغبتها الجنسيه أعلى وهاتتفق ورغبة الرجل وطبعآ ده مش مظبوط لأنه مش شرط
    بالعكس الأنثى بوجه عام بتوصل لأقصى رغبتها بعد الثلاثين بشرط وجود راجل يشعر بأنفعلاتها
    يعنى الموضوع محتاج توعيه مش أكتر
    ومعظم المدونين أعتقد متفهمين لكده نظرآ
    لحصولهم على قدر من الثقافه والوعى
    المشكله فى عموم الشعب المصرى اللى عايش على الموروثات القديمه
    وكتير من أصدقائى متزوجين من نساء من نفس العمر وأحيانآ بتكون البنت أكبر شويه وفيهم متزوج من مطلقات بس مش دى القاعده دول مجموعه من الشباب
    اللى عايشين بمشاعرهم بغض النظر عن الأراء القديمه لأن الزواج مش سهل يعنى من غير تفاهم وحب بيتحول لكارثه كبيره
    والراجل اللى بيتجوز من بنت أصغر منه بعشرين سنه فى أحتمال كبير جدآ أن ميحصلش أنسجام لأنها مع الوقت بتقارن بينه وبين شاب من سنها وعملية المقارنه مش هاتكون فى صالح الزوج
    أنا شايف أن الأعتدال كويس فى كل شىء
    والمبالغه فى الشروط بتعقد الدنيا
    المشكله اللى موجوده حاليآ ان معظم الناس مش راضيه عن علاقتها الزوجيه
    بسبب موضوع المقارنه وعدم الرضى وعدم التوافق وأسباب كتير جدآ
    المهم حاولى تتكلمى عن الموضوع أكتر وأنفعالات الأنثى يمكن الناس تفهم أكتر
    وتعرف أن ألاحساس الداخلى مش بيموت مع تقدم السن بل بالعكس ممكن يزيد
    معلش طولت عليكى

     
  • At 6:13 PM, August 24, 2006 , Blogger Epitaph said...

    شوفي يا ست فريدة كلامك ده صحيح و بيحصل و حيحصل

    واعرف ناس وبنات كويسين جدا في التلاتين ..و نوعية الرجالة اللي بيتقدموا..من الاكبر سنا...و من سبق لهم الجواز

    وغالبا ما بتدور الرجالة فعلا علي بنت صغيرة في الجامعة لسة

    احنا فاهمين ده كله
    بس ازاي نغير نظرة المجتمع
    معرفش

    اقعدت اتكلم مع ماما..يا ستي ايه يعني ان محصلش نصيب وان فلانة دي متجوزتش لدلوقتي دي لسة 28 سنة..اقعدت تقولي لا و ازاي وكلام كتير من اللي بتسمعيه
    وكل امهاتنا و نساء مجتمعنا الشرقي بيرددوه
    وبيظلموا فيه البنت

    والرجالة..اسمع اللي في التلاتين و موافق جدا انه يرتبط بعيلة اصغر منه بكتير
    عشان يشكلها البيه علي مزاجه...مش حتكون ليها خبرة لسه في الحياة و العالم الخارجي
    فحيكون البيه عينها لهذا العالم و المتحكم فيها

    الموضوع كبير كبير كبير يا فيري :))

     
  • At 7:54 PM, August 24, 2006 , Blogger Gid-Do - جدو said...

    فريدة
    فتش عن المراة
    الرجال يحكمون العالم والنساء يحكمن الرجال
    بختصار شديد كل المواريث الاجتماعية الظالمة للنساء فى مجتمعنا يحافظ عليها ويتمسك بها كهنة معبد امون من الامهات اللى هما نساء
    انا سبت تعليق عند عروسة
    ممكن تقرية بدل الاعادة

     
  • At 8:00 PM, August 24, 2006 , Blogger Gid-Do - جدو said...

    اسف اللينك فى تعليقى مبيشتغلش نجرب اللنك ده

    ياللا نبتدي

     
  • At 10:21 PM, August 24, 2006 , Blogger Ahmoss said...

    You are very true about our society regarding this issue.
    My humble opinion is that most men refuse to marry a divorced lady because they have the nightmare of comparison, they always think the divorced lady will compare him to her ex-husband ,and if this come true it would be really scary.
    That is why both men and women prefer to be the first marriage.
    Sorry for writing in English but I don’t have Arabic keyboard

     
  • At 5:27 AM, August 25, 2006 , Blogger littilemo said...

    يا ستى

     
  • At 10:44 AM, August 27, 2006 , Blogger islamventura said...

    انا استطيع ان اقسم لك انى اتمنى ان اجد من احترمه و يحترمنى و اشعر انه الشخص الذى اتخيله و ايا كانت ظروفه و ليس عندى مشكلة غير مع اشخاص و ان شاء الله الانسان قادر على تخطيها

    بمعنى ...
    انا متفق معاكى و هذه الظاهرة بالفعل موجودة بالكامل فى مصر و ذلك لان الاهل فى موضوع النسب بيكونوا فى منتهى الصعوبة و لكن لا حل هنا سوى الرجوع للدين و لا سبب لما نحن فيه فبذلك اجد ان كل العادات القديمة او الفاشلة هذا الشعب متمسك بعيدا عن الدين
    الدين لم يذكر ذلك
    اشعر نوعا ما بانجذاب لشخصيات معينة
    و لكن هل كونها مطلقة من هذا الزوج او ذلك الزوج مشكلة ؟
    هل كونها ارملة مشكلة ؟
    هل كونها لها اولاد اهم عندها من نفسها ؟
    و يجب ان نكون منصفين
    كيف تكون زوجة و ام و اخت و هى ام لطفل او طفلين لاب اخر ؟
    عندما يكون الاختيار صعب
    لن تختار زوجها و تختار اولادها
    و يمكن العادات اختارت الاقرب للخطا و للشر و الغلط

     
  • At 12:38 PM, August 27, 2006 , Blogger salateenoo said...

    هناك بعض الموروثات الإجتماعية التي ننساق خلفها دون النظر إلى صحتها أو سلامتها....
    مثلا إذا اراد الرجل ان يتزوج إمرأة أكبر منه سنا....أو مطلقة أو ارملة....تجد الناصحين الذين يحذرون بشدة من هذه الزيجة...وكيف أنها محكوم عليها بالفشل...

     
  • At 1:39 PM, August 27, 2006 , Anonymous Familiar Stranger said...

    Dear Ferry (I liked how someone called you that - it is cute) & Ahmos,
    Of course I wont go on about your post being right, & that it is true that in our sick male dominated society this the case. But I do disagree with Ahmos on the fact that it is the fear of comparison that stops us from marrying a divorced lady or man; I think it is because, all Middle Eastern men veiw women as "a piece of meat" the younger, the better. Not only that - but if she is divorced, or isnt a virign - then khalas, some other man tasted her, or ate from her, then khalas, matenfa3sh! It is disgusting, and unfair.
    I do not blame only the men in our society - I actually blame the women more. We turned ourselves into a cheap piece of meat! Just open our movies, or music videos & you will see that we have branded ourselves to be "Sex Machines for Men's pleasures" Yani how can you expect the man ba2a not to pick and choose between all the "meat" that is ready availble the most young, untouched, & beautiful meat?
    It is all the WOMEN's fault!
    Our whole society is deemed to Misery as long as we think like this.
    God bless you Ferry for always talking about important issues in our society,
    Love,
    F.S

     
  • At 5:06 PM, August 27, 2006 , Blogger farida said...

    الغريب
    فعلا الكل يفضلونها صغيره
    و فعلا المعظم غير راضي عن حياته الزوجيه
    و موضوع تغير جسم المرأه بعد الزواج طب ما الراجل كمان بيتغير
    قلت لأبي عن صاحبنا الذي تزوج من هي في عمر ابنته
    انت عارف يا بابا مشكلة الرجال الشرقيين انهم مش بيعترفوا ان الست ليها رغبه زيهم و عينها بتتمتع زي عينهم يعني زي ما انت بتتمتع بجسم البنت الصغيره بعنيك و بتنتقد العيوب اللي في جسم مراتك الكبيره .. هي كمان بتبص لك و تشوف ركبك اللي نزلت النص و صدرك اللي اضمحل و كرشك الي لا مؤاخذه دلدل .. ما بالك بقى لو كانت هي بنت صغيره جميله و شابه و مشدوده ,. تحب فيك ايه
    و بعدين صاحبنا ده حيعمل ايه بعد كام سنه و رغبة البنت دي تعمل فيها ايه؟؟؟
    الراجل مبيشوفش غير اللي هو عاوز يشوفه .. الرجاله ساعات اغبياء تفتكر ليه الرسول قال للراجل تزين لها و تجمل لها و تعطر لها


    والدي سرح و فكر في الكلام و تحولت نظرته للموضوع من رجل مبسوط بصاحبه اللي تزوج صغيره إلى تأمل في فكر الاخرى .. الأنثى الصغيره التي تحدثت بلسانها انا

     
  • At 5:13 PM, August 27, 2006 , Blogger farida said...

    ابيتاف
    نغير النظره باننا نربي ولادنا صح
    و فعلا الرجل الشرقي يحب امرأه يشكلها هو


    جدو
    انا قريت تعليقك
    و انا كتبت ده في أخر البوست عن الام و الاخت الرافضتان تماما لمبدأ الزواج من مطلقه
    صدقني انا لا اهاجم الرجل على العكس انا مفروسه من المرأه اكثر


    احمس
    فتحت عيني على وحهة نظر جديده
    ممكن جدا ده يكون وارد المقارنه حاجه بيقلق منها الطرفين
    و شكرا للزياره و التعليق


    f.s
    you are so right in blaming women causse women love this image of haramlek in our society
    women make from themselves slaves for men
    they forgive men and judge women which is really strange and hateful in my opinion
    thanks for interest and comment
    love
    farida

     
  • At 2:52 AM, August 28, 2006 , Blogger أجدع واحد في الشارع said...

    بجد انا مش عارف اقول ايه
    بس انا مع جدو انا اقريت التعليق ولقتو بيتكلم صح وصح اوى كمان

     
  • At 9:22 AM, August 28, 2006 , Blogger عمر said...

    فى حاجات كتير اوى سببها الظروف الاقتصاديه والتخلف الاجتماعى

     
  • At 9:37 AM, August 28, 2006 , Blogger Ezz said...

    برضه يا فريدة ما ننساش أن الرجل في الشرق العربي بالتحديد يعيش في مجتمع يقيس رجولة الرجل و فحولته بقدرته على ممارسة الجنس مع بنت صغيرة من منطلق أن البنت الصغيرة ستكون في حالة نهم وشبق لا يستطيع أروائها سوى شاب "عنتيل" على رأي عم عبدالله. طبعا لما يجي راجل في أواخر الأربعين أوائل الخمسين و ما فوق فعلا أراه يبحث عن إمرأة مطلقة أو فاتها قطار الزواج -بمقياس المجتمع أن بنت الثلاثين فاتها القطر و يمكن داسها كمان في السكة- يبحث عن بنت 30 سنة و ساعات أصغر كي يثبت رجولته و فحولته .. نحن شرق عربي تعتبر الفحولة فيه ركن أساسي من أركان الثقافة. أنا تعرفت على رجل تعدي الستين بقليل تزوج من فتاة لا يزيد عمرها عن 21 سنة و كل مره يقول لي أنه أكتشف أنه أضاع 25 سنة من عمره سدى لأنه لم يتزوج الزوجة الثانية من 25 سنة فاتت. الموضوع يطول. عز

     
  • At 1:03 PM, August 28, 2006 , Blogger الغـــــــــــــريب said...

    عزيزتى فريده
    متهيألى أن التعليق اللى كتبته قبل كده بيعارض فكرة الزواج ببنت صغيره
    أنا نقلت طريقة تفكير كتير من الرجاله
    رغم أعتراضى عليها
    لو تفضلتى ممكن تقرأى التعليق بتاعى تانى
    خالص تحياتى

     
  • At 3:14 PM, August 28, 2006 , Blogger Sampateek said...

    فريدة
    بتعجبني كتاباتك و ردودك
    فانت تتمتعي بقدر من التوازن و التعقل في كتاباتك
    و مدونتك فيها قدر عالي من الصدق و الحقيقة
    و ان كان لكل قاعدة شواذ
    لكن مجتمعنا يرفض ان يتزوج الرجل الذي لم يسبق له الجواز بمطلقة
    علي كل حال الامور المتعلقة بالزواج دي قسمة و نصيب
    و يمكن ده ناقوس الخطر لتمسك كل زوجة ببيتها لانها لو فقدته يمكن متلقيش فرصة احسن
    شعور ممتزج من الانغلاب علي الامر و الصبر و قلة الحيلة
    و لكن ابتسمي فنحن في الشرق الاوسط
    خالص تحياتي

     
  • At 5:25 PM, August 28, 2006 , Blogger ME said...

    فريدة،
    جيت أكتب تعليق لقيته هيبقى طويل اوى، فكتبته عندى عشان ماخدش مساحة عندك، وكمان عشان انا بحب اكتب عن الناس، لو حابة تشوفى التعليق ده يشرفنى

     
  • At 1:58 AM, August 29, 2006 , Blogger farida said...

    عزيزي الغريب
    انا قرأت تعليقك و انا لم اشر في تعليقي انك موافق
    انت طلبت مني في نهاية تعليقك التحدث عن مشاعر الانثى و هذا مافعلته عندما نقلت حواري مع والدي

    المهم حاولت تفنيد وجهة نظر الرجل عموما و التي اشرت لها انت

    على العنون شكرا فعلا لمتابعتك
    و متزعلش احسن انا حسيتك زعلان لأنك فاكر اني مفهمتكش

     
  • At 2:09 AM, August 29, 2006 , Blogger farida said...

    ابن الشارع
    اهلا بيك
    و انا كمان موافقه رأي جدو

    littliemo
    نعم يا سيدي

    اسلام
    فعلا المطلقه ذات الأولاد مثقله بمسئوليه
    لكن مجتمعنا ينكر عليها حقها في الحياه
    انا سعيده بتفتحك للشخصيه ايا كانت ظروفها و اعلم ان هناك كثيرون مثلك
    لكن هل يصمدا امام المجتمع؟


    سلاطينو
    كلامك صح
    و ايه اخبار الجواز ؟؟



    عمر
    اهلا بيك
    و طبعا معظم اللي احنا فيه نتيجه للظروف المحيطه

     
  • At 2:31 AM, August 29, 2006 , Blogger farida said...

    كلبوزه
    يا اهلا وسهلا و انا اقول البلوج نور ليه
    يا ستي متشكره على الاعجاب

    و انا ماسكه في جوزي بايدي و سناني
    بس والله عندي ثقه في نفسي
    و دايما اقول له لو طلعت متستهلش اكيد حعيش و احب اصل انا عندي ثقه عمياء في ربنا

    المهم
    ربنا يهدي مجتمعنا و ير حم نسائنا

     
  • At 10:14 AM, August 30, 2006 , Blogger Ezz said...

    سيد الحرافيش و الحكائين و سيد الناس فخر العمر و منتهى الشرف.. نجيب محفوظ أبي و سيدي و معلمي.. إلى رحمة الله.

    مقطع من ثرثرة فوق النيل التي كتبت عام 1972:
    (.. عليكم اللعنه .. ليس أعدى للكيف من التفكير . وعشرون جوزة كادت أن تضيع هباء . ولا شئ يبدو راسخ الايمان كشجرة البلح ، كما ان اصرار الهاموش يستحق الاعجاب ، ولكن اذا فقدت أنات عمر الخيام حرارتها فقل على الدنيا السلام ، وجميع هؤلاء الساخرين تكوينات ذرية ، وهاهو كل فرد منهم ينحل الى عدد محدود من الذرات . فقدوا الشكل واللون ، اختفوا تمام ، ولم يعد منهم شئ يرى بالعين المجردة ، وليس ثمة هناك الا أصوات .. "

     
  • At 5:10 PM, August 30, 2006 , Blogger AZ said...

    السبب بسيط ان الجواز عندنا مرتبط بمفهوم الجنس بالنسببه للراجل والسَنَد بالنسبه للبنت
    الراجل بيدور علي واحده تشبعه جنسيا (اولا بعدين بقيه الحاجات) والست بتدور علي واحد يحسسها انه سند ليها (للاسف ده مرتبط بالفلوس عادة)
    الناس مش فاهمن يعني ايه جواز فالطبيعي انهم يختاروا غلط ويتجوزوا بطريقه غلط والطبيعي انهم يتطلقوا او يرفضوا الجواز من اساسه
    وياريت ماحدش يقولي بتعممي عشان احنا كلنا عارفين ان في استثناء بس للاسف انا شايفه ان الشريحه الاكبر من المجتمع بتغكر بالطريقه السابق ذكرها اعلا.. عدوا بعد اسبوع خدوا الاستشاره

     

Post a Comment

<< Home