farida and trying to be special

Monday, September 11, 2006

و برضه كلنا ليلى .. احنا احرار



في البدايه و بإختصار و باللغه العاميه علشان الكل يفهم

مافيش حاجه اسمها راجل و ست ضد بعض إحنا بنكمل بعض

محدش فينا بيكتب علشان يطالب بتأخير البنات أو مساواتهم بالولاد

و لا انا بكتب علشان معقده و بابي و مامي ضغطوا عليا " محدش يعرف عني حاجه اصلا مفيش و لا كلمه في البروفايل بتاعي يعني مش جايز ابويا و امي ميتين" ليه التجريح ده؟؟

و لا انا بهيج المشاعر

و لا حد فينا بيكتب علشان نعمل تفرقه عنصريه و نهيج المشاعر ضد الرجاله

هو في ست عاقله تكره الرجاله!!!؟

طب ده انا متخيلش حياتي من غير حبيبي

احنا بس زعلانين من اي ظلم أو وضع غلط من ست أو راجل

من المجتمع ككل

مش ثورة نسوان

و مش بنزعل من كلمة نسوان و لا حريم عادي يعني انا واحده " بالتاء المربوطه " و مش زعلانه

ست و بنت و انثى و إمرأه و حرمه ووليه كمان.... بس مش وليه غلبانه ...ربنا مايجيب غلب

و مش بكتب و لا بنكتب لأنننا شوية ستات عاملين حمله ضد الرجاله

طب ليه بنكتب

ليه بنتكلم؟؟

علشان احنا احرار

علشان هو ده جمال النت

انك تعبر عن نفسك تكتب زي ما انت عايز

و لا اللي انت كتبته ده محطوط في ورق بفلوس و لا في برنامج مجبر على متابعته علشان مفيش غيره

انت اللي ب تيجي لغاية عندي و تقرا

و ميعجبكش الكلام ...

و ماله ... انت حر

عاوز تعلق أو تكتب عندك

برضه انت حر

لكن بلاش شتيمه و عصبيه

دي مش خناقه في شارع

و عروق رقابتك نافره و عمال تشتم فينا

انا لا دفعتك فلوس و لا أجبرتك تضيع وقتك معايا

انا بقالي يومين عماله اضحك

مش ممكن .. في ردود افعال غريبه

طبعا عادي ان الحمله دي متعجبش ناس

طبعا حقكم

عادي... شايفنها مبالغ فيها او ملهاش لازمه

طيب

احنا بقى عندنا هدف بنحاول نوصله

مش عاوز تسمعني انت حر

و اللي عايز يسمعنا برضه حر

مش قادر تشوف اللي بين السطور

و ماله... يبقى انت مش فاهم او انا معرفتش اوصل نفسي صح

لكن بلاش مصادره على الرأي

بلاش غلط و إهانه و تسطيح

قول اللي انت عاوزه بنضج و تحضر

عارضني زي ما انت عاوز

بس احترمني زي ما بحترمك

يا سيدي .. يا ستي

يا جماعه

يوم 9 كل شهر كلنا حنكتب حاجات عننا

كبنات و ستات يعني

اللي عاوز ييجي يشوف و يقرا و يقول رأيه سواء كان بالسلب أو الإيجاب يشرفنا

اللي بقى مش عاجبه القعده و لا اللمه

و لا الشعار و لا الفكره

و عمال يشتم في الموضوع من أساسه

ييجي ليه!!!!!!؟

ناس قاعدين بيتكلموا

جاي تقوللهم قوموا امشوا

و يا ريتك بتقولها بالأدب

هو بيتك!!!!هه

متقراش ليهم يا سيدي

و الله انت حر

و احنا كمان احرار

انا بكتب في السياسه و عن مصر لأني مصريه

و بكتب عن المشاعر و الجنس كإنسانه

و بكتب عن الدين كمسلمه

و يوم 9 كل شهر حكتب عن الست ك ست

لا عنصريه و لا بتاع

جزء من تكويني اني واحده .. مؤنثه يعني

عاوزه اعبر عن الجزء ده

و بس

تنويه: شكرا لكل من علق و ناقش بموضوعيه حتى من لم تعجبه الفكره شكرا لرقيك

Labels:

4 Comments:

  • At 2:38 AM, September 12, 2006 , Blogger Dr. Tantawy said...

    كويس اني اول واحد يكتبلك تعليق شرف ليه يعني

    تانيا .. بما انك مش بتزعلي من النقد و بما اني نويت انقد خلاص :)) فاسمحيلي .. تحمسك لموضوع كلنا ليلى زياده شويتين .. حاولي تخرجي من عباءتها شويه .. انا متأكد ان حياتك فيها احداث اخرى غير هذه الحمله اللي مازلت مصر ان اسلوبها خاطئ جدا جدا

    انا مش بحاول اعصيكي عليهم لكن لو كانت كل واحده منكم اكتفت ببوست واحد عن الموضوع كنت صدقت كلامكم انها مش حمله و كده .. لكن كتر الكتابه فيه هتأكد كلامي

    أخيرا .. ليس لي اي اعتراض على موضوعات البوستات التلاته .. واقعيه و بتحصل يعني

    تحياتي لك ولكتاباتك الطويله :) لكن ممتعه بجد .. يمكن انا مش قادر عليها علشان ايام امتحانات و التركيز مش كامل يعني :)

     
  • At 5:22 PM, September 12, 2006 , Anonymous me2 said...

    من فترة و انا عايزة اعلق في مدونتك بس والنبي متقفليش التعليقات على بلوجر بس لأني كده مش هعرف اعلق :)
    المرة دي إنتي مشدودة قوي و انا عارفة ليه لأني مستحملتش أقرأ تعليق واحد من التافهين و خاصة بعد رده عليا و بدل مانساق وراه قلت أرميه ورايا أحسن
    للأسف معظم (القبضايات) على رأي إخوانا الشوام نزلوا ضرب و تلطيش بدون فهم (أصله حافظ مش فاهم) معلش متوقع زي ما فيه بنات دخلتها في الموضوع كان غلط و ده كان السبب و جنب النوعية دي من اكتابات ضاعت المواضيع اللي فيها الفايدة
    يمكن لان المتحمسات كان صوتهم أعلى مننا شوية و قرائهم اكتر
    معلش تتعوض في التدوينات الجاية

     
  • At 6:42 PM, September 15, 2006 , Blogger Jannah said...

    كنت عايزه اقترح حاجة

    كثير من البنات اللى بيكتبه فى كلنا ليلى بيحكوا عن مواقف هما اتظلموا فيها من اهاليهم او ناس يعرفوهم... فليه ما تعملوش support groups

    تساعدوا بعض انكم تعدوا من المواقف دى و ماتخلهاش تأثر فى حياتنا.
    وربنا ما يجيب غلب بس البنات دى صعبت عليا و الشكوى لوحدها او تغيير النظرة مش هو اللى هيحل مشكلة كل واحدة فيهم, بس مناقشة الحل و ازاى يعدوا من كل تجربة اقوى من الأول ده اللى ان شاء الله يعمل فرق عند كل واحدة فيهم. بالذات لو هم كثير و عندهم نفس المشكلة و مواقف شبيهة ببعض.

     
  • At 2:08 AM, December 22, 2006 , Anonymous Anonymous said...

    I could not believe what I am reading today?. It is about time that my sister, my daughter, my mother in Egypt to talk, to sing and to be loud. I am proud of you for fighting your fight for your self-respect for your freedom. You are not a six slave nor God created you to serve others without your consent and love. You are an equal human with feeling and aspersion like me and him. Please be loud Lyla your loud voice is a music to my ear. This is the first step and biggest step to librate our society from the illness and sickness that exists in the last 33 years.

     

Post a Comment

<< Home